ದೇವಸ್ಥಾನದ ಹತ್ತಿರದಲ್ಲಿಯೇ ಇರುವ ಮೇರುತಿ ಪರ್ವತ ಪ್ರಸಿದ್ಧವಾಗಿದ್ದು ನಯನ ಮನೋಹರವಾಗಿರುತ್ತದೆ. ಹಲವಾರು ಜನ ಚಾರಣ ಮಾಡುತ್ತಾರೆ, ಇದೇ ಪರ್ವತದಲ್ಲಿ ಮಧ್ಯಭಾಗದಲ್ಲಿ ತಪಸಾಣೆ ಎಂದು ಕರೆಯಲ್ಪಡುವ ಗುಹೆಯಿದ್ದು, ಇಲ್ಲಿ ಪುರಾತನ ಕಾಲದಲ್ಲಿ ಋಷಿಮುನಿಗಳು ತಪಸ್ಸನ್ನು ನಡೆಸಿದ ಕಾರಣ ತಪಸ್ಸಿನ ಅಣೆ ಅಂದರೆ ತಪಸ್ಸಿನ ಗುಹೆ ಎಂದು ಕರೆಯಲ್ಪಡುತ್ತದೆ. ಇಲ್ಲಿ ನೀರು ಹುಟ್ಟುತ್ತದೆ ಹತ್ತಾರು ಗ್ರಾಮಗಳಿಗೆ ಇಲ್ಲಿಂದಲೇ ಕುಡಿಯಲು ಮತ್ತು ಕೃಷಿಗೆ ನೀರು ಬಳಕೆಯಾಗುತ್ತದೆ. ಇಲ್ಲಿಯ ನೀರು ಕುಡಿಯಲು ಬಹಳ ರುಚಿಕರವಾಗಿರುತ್ತದೆ. ಸಣ್ಣದಾಗಿ ಹರಿಯುವ ನೀರು ನೂರಾರು ಜಲ ಸೇರಿದಾಗ ದೊಡ್ಡದಾಗಿ ಹರಿಯುತ್ತದೆ. ಇದು ಇಲ್ಲಿಯ ವಿಶೇಷವಾಗಿದೆ. ಪ್ರತಿ ವರ್ಷ ತಪಸಾಣೆಯಲ್ಲಿ ಗಣಹೋಮ ನಡೆಸಿ ಮಳೆಗಾಗಿ ಪ್ರಾರ್ಥಿಸುತ್ತಾರೆ. ಪ್ರತಿವರ್ಷ ಮಾಘ ಬಹುಳ ಪಂಚಮಿಯ ದಿನದಂದು ರಥೋತ್ಸವ ನಡೆದುಕೊಂಡು ಬಂದಿದ್ದು, ದೇವರ ಉತ್ಸವಮೂರ್ತಿ ಅಲಂಕರಿಸಿದ ಬೃಹದಾಕಾರದ ರಥವು ರಾತ್ರಿಯ ವೇಳೆ ಕಡಿದಾದ ಜಾಗದಲ್ಲಿ ಮಂಜನಕಟ್ಟೆ ಯವರೆಗೆ ಸಾಗಿ, ಇಳಿಜಾರಿನ ರಥಬೀದಿಯಲ್ಲಿ ಸಾಂಗವಾಗಿ ಬಂದು ನೆಲೆಗೊಳ್ಳುವ ರಥೋತ್ಸವವನ್ನು ನೋಡುವುದೇ ಒಂದು ಸಂಭ್ರಮವಾಗಿದೆ. ಇದು ಇಲ್ಲಿನ ಬಹಳ ವಿಶೇಷ ಸಂದರ್ಭವಾಗಿದ್ದು ದೇವರ ಪವಾಡವೇ ಆಗಿದೆಯೆಂದು ಅನಿಸಲ್ಪಟ್ಟಿದೆ. ಈ ರೀತಿಯ ಕಡಿದಾದ ರಥಬೀದಿಯಲ್ಲಿ ರಥೋತ್ಸವ ನಡೆಯುವುದು ಎಲ್ಲಿಯೂ ಇಲ್ಲ ಅದನ್ನು ಇಲ್ಲಿ ಮಾತ್ರ ನೋಡಲು ಸಾಧ್ಯ ಎಂದು ಭಕ್ತಾದಿಗಳು ದೇವರ ಪವಾಡವನ್ನು ಕೊಂಡಾಡುತ್ತಾರೆ. ರಥವನ್ನು ಎಳೆಯಲು ಪ್ರತಿವರ್ಷ ಕಾಡಿನಿಂದ ಸಂಗ್ರಹಿಸಿದ ಬಳ್ಳಿ (ಮಿಣಿ, ಬಿಳಲು ಎಂದೂ ಕರೆಯುತ್ತಾರೆ) ಯನ್ನು ಬಳಸುವುದು ಅನಾದಿ ಕಾಲದಿಂದಲೂ ವಾಡಿಕೆ ಇದ್ದು ಈಗಲೂ ಅದೇ ಪದ್ಧತಿ ಮುಂದುವರೆದಿದೆ. ಇಲ್ಲಿ ವಿಶೇಷವಾಗಿ ಮಕ್ಕಳಾಗದಿದ್ದರೆ ದೇವರಲ್ಲಿ ಪ್ರಾರ್ಥಿಸಿ ತುಲಾಭಾರ ಸೇವೆಯನ್ನು ಮಾಡಿಸುವುದಾಗಿ ಹರಕೆ ಹೊತ್ತು ಕೊಂಡರೆ ಇಷ್ಟಾರ್ಥಗಳು ಈಡೇರುವುದು ಮದುವೆ ಆಗದೇ ಇದ್ದವರು ಈ ದೇವಸ್ಥಾನದಲ್ಲಿ ಪ್ರಾರ್ಥಿಸಿಕೊಂಡರು ಶೀಘ್ರ ಕಲ್ಯಾಣ ಭಾಗ್ಯವನ್ನು ಕರುಣಿಸುವುದಾಗಿ ಹಾಗು ಕಷ್ಟಕಾರ್ಪಣ್ಯಗಳು ಬಂದಾಗ ಬಹಳ ತೀವ್ರ ಅನಾರೋಗ್ಯ ಕಾಡಿದಾಗ ದೇವರಲ್ಲಿ ಪ್ರಾರ್ಥಿಸಿ ಸೇವೆ ಸಮರ್ಪಿಸಿದರೆ ಎಲ್ಲಾ ಪರಿಹಾರವಾಗುವುದೆಂಬ ಪ್ರತೀತಿ ಇದೆ.